30 June, 2010

ठीक एक वर्ष अघि कतारको समुद्रमा भएको पानी जहाज दुर्घटनामा मृत्यु भएको थप एक नेपालीको क्षतीपुर्ती रकमको लागि नेपाली दुतावासले यहाँको श्रम विभागमा मुद्धा दर्ता गरेको छ ।

मृत्यु हुने १२ नेपाली मध्ये एक जनाको परिवारको अख्तियारनामा -पावर अफ एटर्नी) स्वदेशबाट नआएपछि मुद्धा दर्ता हुन सकेको थिएन । कटकुइया-१, बनियाँगाऊ, बाँकेका मृतक अब्बास अहमद सईको परिवारबाट अख्तियारनामा आएपछि सोमवार मुद्धा दर्ता गरेको जनाएको छ ।

कामको सिलसिलामा दुर्घटनामा परेका प्रत्येक कामदारको परिवारले ब्लड मनी स्वरुप कंपनीबाट २ लाख रियाल - ४० लाख रुपैया) क्षतीपुर्ती पाउनु पर्ने कतारको कानुनी व्यवस्था छ । दुतावासले मृतककी श्रीमती अप्सरा र आमा इस्लामाको अख्तियारनामा परराष्ट्रले प्रमाणित गरेर पठाई दिएपछि ब्लड मनीको लागि मुद्धा दर्ता गरेको हो ।

'अख्तियारनामा आएर मुद्धा दर्ता भइसक्यो, अब के हुन्छ हामी अनुगमन गर्दै जाने छौं' दुतावासले भनेको छ । मुद्धा दर्ताको लागि अख्तियारनामा र नाता प्रमाणितको प्रमाणित काजगात हुनपर्छ । उनको नाता प्रमाणितको कागजात पहिल्यै आए पनि अख्तियारनामा आएको थिएन ।

सईको परिवारको अख्तियारनामा पठाई दिन दुतावासले  परराष्ट्र मन्त्रालयमा २ पटक पत्राचार गरेको थियो । तर मुद्धा दर्ता गर्ने बाँकी एक साताको म्याद जुन ३० -असार १६) हुन लाग्दा पनि आएको थिएन । अख्तियारनामा नभएर मुद्धा दर्ता हुन नसेकेको समाचार कान्तिपुको असार १० को अंकमा प्रकाशित भएको थियो ।

पानी जहाज दुर्घटनामा मृत्यु भएका अन्य ११ जनाको कागजात भने परराष्ट्र मार्फत पहिल्यै आएकोले पुष २१ गते नै उनहिरुको दर्ता भईसकेको छ । पहिल्यै दर्ता भएका मृतकको ब्लड मनी तत्काल भराई दिन दुतावासले कामदार कार्यरत कंपनी एचबीके पावर क्लिनिङलाई एक साताको म्याद दिएको थियो । उक्त म्याद विहीवार पुरा हुँदै छ ।

कतारको रस्लाफानस्थित समुद्रमा ०६६ असार १६ -२००९ जुन ३०) मा स्थानीय समय अनुसार विहान साढे ६ बजे दुर्घटनामा परी २४ कामदार मारिएका थिए । जसमध्ये १२ नेपाली र १२ भारतीय कामदार हुन् । समुद्रमा भएको ग्यास प्लान्टको सफाई गरेर र्फकदै गर्दा जहाज पल्टिदा उनीहरुको निधन भएको थियो ।

Source: eKantipur